விஜயகாந்த் சூசகம்

 ""ஆட்சியாளர்கள், பிரேக் இல்லாத வாகனத்தை நிதானம் இல்லாமல் இயக்கி விட்டனர். இனி அந்த வாகனத்தை அவர்களே நினைத்தாலும் நிறுத்த முடியாது. அது கவிழ்ந்து, விரைவில் ஆட்சி மாற்றம் ஏற்படப் போவது உறுதி, '' என, தே.மு.தி.க., தலைவர் விஜயகாந்த் பேசினார்.

விழுப்புரம் மாவட்டத்தில், பல்வேறு கட்சிகளை சேர்ந்த ஆயிரத்திற்கும் மேற்பட்டோர் தே.மு.தி.க., தலைவர் விஜயகாந்த் முன்னிலையில் அக்கட்சியில் நேற்று இணைந்தனர். கோயம்பேடு தே.மு.தி.க., தலைமை அலுவலகத்தில் நடந்த விழாவில் விஜயகாந்த் பேசியதாவது: எனக்கு என்ன கொள்கை இருக்கிறது என்று கேட்டு மரியாதை குறைவாக பேசுகின்றனர். மக்களின் வறுமையை ஒழித்து வருமானத்திற்கு வழிசெய்வதுதான் எனது கொள்கை. நீங்கள் போடா என்றால் நானும் போடா என்பேன்; வாடா என்றால் நானும் வாடா என்பேன். காரணம் எனக்கு பயம் கிடையாது.

புதிதாக கட்சி ஆரம்பித்து நான் முதல்வர் பதவிக்கு ஆசைப்படுகிறேன் என்கின்றனர். முதல்வர் பதவிக்கு நான் ஆசைப்படுவது சத்தியமாக, வாஸ்தவம் தான். ஆனால், துணை முதல்வர் ஸ்டாலின், மத்திய அமைச்சர் அழகிரியால் அதை தைரியமாக கூற முடியுமா? அணையப்போகும் விளக்குதான் சுடர் விட்டு எரியும். காமன்வெல்த் போட்டி மூலம் கல்மாடி 8,000 கோடி ரூபாய் ஊழல் செய்தார், ஐ.பி.எல்., கிரிக்கெட் மூலம் லலித்மோடி 470 கோடி ரூபாய் ஊழல் செய்தார் என்கின்றனர்.இதிலிருந்தே இந்தியாவை ஊழல்வாதிகள் ஆளுகின்றனர் என்பது வெட்ட வெளிச்சமாகிவிட்டது.

மக்களுக்கு இலவச "டிவி', காஸ் அடுப்பு, அரிசி கொடுத்து விட்டால் வறுமை ஒழிந்து விடாது. அவர்களின் வருமானத்திற்கு வழி செய்தால் மட்டுமே வறுமையை ஒழிக்க முடியும். அதற்காக நல்ல பல திட்டங்களை சிந்தித்து கொண்டு இருக்கிறேன். இலவசங்கள் கொடுத்ததை சாதனை என்று கூறுபவர்கள், ஓட்டுக்கு நோட்டு கொடுப்பது வேதனையாக இருக்கிறது. அவர்கள் கோடி கோடியாக சொத்து சேர்த்து இருப்பதால் நோட்டுக்களை கொடுக்கின்றனர்.

ஆட்சியாளர்கள் "பிரேக்' இல்லாத வாகனத்தை நிதானம் இல்லாமல் இயக்கி விட்டார்கள். இனி அந்த வண்டியை அவர்களே நிறுத்தினாலும் நிறுத்த முடியாது. விரைவில் ஆட்சி மாற்றம் ஏற்படப் போவது உறுதி. பா.ஜ., ஆட்சி நடக்கும் மாநிலங்களில் ஊழல் நடக்கவில்லை. மற்ற மாநிலங்களில் தான் ஊழல் தலை விரித்தாடுகிறது என பா.ஜ., மூத்த தலைவர் அத்வானி கூறுவது உண்மை. நான், பா.ஜ.,வை பற்றி பேசினால் அந்த கட்சியுடன் கூட்டணி வைத்துக் கொள்ளப்போகிறேன் என்பார்கள். நான் மக்களுடனும், தெய்வத்துடனும் மட்டும் தான் கூட்டணி வைப்பேன். தேர்தலுக்கு இன்னும் நேரம் இருக்கிறது. நாட்கள் நெருங்கும் நேரத்தில் அதை பார்த்துக்கொள்வேன். இவ்வாறு விஜயகாந்த் பேசினார்.